عيد شاب يمني

يمنات

ماجد زايد

من معه شال يا خبرة نفس لون المعوز حقي يسلفني أشتي أطقم بالعيد حتى ساعتين !! 

باقي عندك شال من السنة الأولة يا مقص رد الأول

أنتم أصحاب فاشلين وأوغاد.

ناهي نشتي نحلق وكل الحلاقين مقعننين مطلع من الزحمة ، أين به حلاق مقطف فاضي ، هو ما معانا من العيد الّا الحلاقة والشال السلف ، والعطر ضروري نشتري واحد تعبية مع سبرت زيادة أحسن وارخص وأكثر ويجلس شمه أكثر ، أوه نسيت الشامبو اللي ضد القشرة .. لا تصدق يا أخضع والله أن الشامبوهات كلهن يدين القشرة والصلعة ، جالس يشقى على الشامبوهات والحلاقين وقدوا أصلع.

أيوه جعالة العيد من أيشتريهن هذا العيد !! ضروري اللوز بلدي رجاءاً ، أأأهي أأهي شحات ويشرط .. شد حزامك يا بطل وأشتريتهن أنت ، ناهي ماعدنشتيش.. 

ييه أين أنت يا ذاك نزل الصحون الكعك للفرن وانتظرتهن ورديتهن فيسع.. ناهي ناهي جني لنا جني يشلنا من عندكم.

ناهي منين نلقى صرف أبو خمسين لغدوة نوزعها للجهال.. بالذات الجهال لوما تديش لهم زلط يوم العيد يكرهوك بقية العمر..

أما عسب المكالف عادي أعمل نفسك ميت صبح العيد وأرقد لاظهر وحن تخرج تشتري قات أخرج ساع السارق ، السوق محظي أبن كلب يالله قدوا عيد عادي لا زادوا علينا.

من لقيته في الطريق أبتسم له وخليك مشتبح ومكنه سعيد ومبارك وعاقل وحاج وحريوا وطقطقه طقطقه ، المهم حسسهم أن العيد سعيد ومرغد من صدق 

حن ترجع للبيت وتلقى أمك وأبوك قبل الغداء .. شغل موسيقى طربية وقول ما أجمل العيد وأنتما معي ، عيدكما مبارك وسعيد يا أغلى شيء في حياتي وحب راس أمك وأبوك ووقت ما تحب راس أبوك قله التخزينة غدوة عليك رجاءا لا تنساني.

قات العيد ما يطعمش ، هذا شيء طبيعي ، قبل المغرب بشوية يجين تفاكير الحزن والأكتئاب ، ماهذا العيد الفاشل والحزين !! العيد والله ماهو سعيد اوذانا ضابح من الصبح ولا أفتهنت ولانا سعيد ولا شي ، أسكه يا اخي معك شقارة هات حبة ، والولاعة ويني من معه ولاعة يا خبرة ، ولا احد رد ، يااي الله يلعن اللي يخزن عندكم القات حقي ضابحات وحزينات ، من أين نخزن غدوة نشتي قات سوا ، ولا احد رد ، الله يلعنكم خاطركم.

أسكه يماه هاتي لي كعك نطعمهن قدوا بحق الشقاء والملاحقة. سير شل لنفسك وغطيت الباقيات ، خرجت الكعك للصحن وسرت تسكب شاهي والثلاجة فاضي.. ناشف ناشف يا عيد يا عبدو يا سعيد. 

ساعتين تقلاب ولابش نوم ، أسكه افتح التلفون ، اوه البطارية فاضية أشتي أشحن ، بطارية البيت والكل فاضي.. أين أسير مفعل ، ارجع أرقد غصب والا انتحر لي وأهجع ، أنتحر وبعدين جهنم ، لا ، وقسمبلاه ما انتحر ، أرقد وخلاص !!

عيد سعيد يا سعيد 

ولعلمكم: 
هموم وعادات وطقوس الإستعداد للعيد أجمل بكثير من العيد نفسه رغم زبلها وتكاليفها.

للاشتراك في قناة موقع يمنات على التليجرام انقر هنا

لتكن أول من يعرف الخبر .. اشترك في خدمة “المستقلة موبايل“، لمشتركي “يمن موبايل” ارسل رقم (1) إلى 2520، ولمشتركي “ام تي إن” ارسل رقم (1) إلى 1416.